Nisciunus nci cumprendíat cosa.
Paulu fiat unu bellu piciocu e fiat forsis su prus abbili de is cumpangius e immoi si fiat arrichendi puru cun su cummerciu.
Issa fiat legia, chentza de dentis, mandrona e bagassa pérdia.
Ma Paulu fiat ancora innamorau de issa, una cosa chi non fait crei.
E immoi fiant bivendi in cuatru in sa propriu domu: Paulu, issa, cussa minca buddía de fotografu chi non si cumprendíat si fessit su sposu nou de issa o de totu de is duus e cussu callelleddu scimpru chi ddis cagát totu su logu.
Mi ndi beníant a domu totus de is cuatru e portánt sempri cosa de papai: atrus amigus non ndi teníant prus, ma deu a Paulu ddu bolemu tropu beni e mi tocát a ddu cumpatiri.
A bortas ndi portánt puru a atrus butegheris, ma ddis fademu subbitu cumprendi ca deu femu de atra arratza e non torránt.
Arrustemus e papamus e bufamus, ma sa cosa fiat e abarrát trista.
A sa fini Paulu at atobiau un’atra femina prus abbista e a issus ddus at mandaus a cagai.
Insomma, a cagai po manera de nai, ca issa fiat socia in sa sienda e si nd’est pigada sa medadi: una pariga de centu millionis.
Ma cun s’atra femina Paulu s’est postu a girai miliardus de francus.
Candu dd’at lassada, mi seu detzidiu a mi sfogai cun Paulu, ca custa cosa dda tenemu in guturu de unus cantus annus e dd’apu contau ca issa iat tentu cosa cun Giorgi puru.
Giorgi fiat stetiu issu puru sociu, innantis de si certai–po curpa de issa e de sa sorri de Paulu–e Giorgi fiat piciocu de coru bonu, ma pagu intelligenti e grandu coddadori.
Anca una borta issa dd’est approlliada a domu a ddi circai contus.
Giorgi–ca est de aderus de coru bonu–non at tentu s’atza de ddi nai ca no.
–Mi nci seu sterriu in su letu e issa mi nde dd’at bogada a foras e si dd’at posta in buca.
E deu, crosidadosu, ma mi parit cosa normali, ddi domandu: “E comenti est? Eja… insomma… chentza de dentis?”
–Oja, lassaus a perdi…Insaras dd’apu nada a si spollai e issa at incumentzau: “No! A Paulu custu non si ddu potzu fai! Issu est tropu bonu cun mei. E cun tui! No, non fait!” Deu femu giai in tira e mi seu inchietau e dd’apu nada: “Tui ses comenti cussa amiga mia de sexi annus chi succia minca e dda pigat in culu, ma su pillitu non ddu donat, ca si bolit cojai in biancu!” Issa s’est chesciada e si nd’est andada”.
Totu custu a Paulu non si dd’apu contau.
Issu s’est arrinegau su propriu e a issa dd’at fata unu scandulu.
Issa mi nd’est aprolliada a domu cun su fotografu a mi circai contus, ca femu faulanciu, ca issa cun Giorgi non iat coddau mai.
Eja, si seis pensendi a Clinton, ma custu est sutzediu dexi annus innanti.
Deu dd’apu arrispundia sceti ca deu faulas non ndi contu.
