Claudio Parodi m’at mandau sa fotografia de issu, Professori.
Ca Professori campát bendendi folla de murta a is carnitzeris dd’apu contau medas bortas.
Ma su contu prus bellu de Professori ddu contát issu e totu, mancai deu sa primu borta dd’apa intendiu de Giancarlu “Su Cavuru”, su bixinu de domu de arratza gresienti-gresienti e a sangunau pisanu.
Anca, a sa fini de sa gherra, custu sordau americanu nieddu, a Professori dd’iat circau su culu. Professori insaras fiat giovunu e a beciu puru non fiat legiu.
Candu dd’at contau a mei su contu–acabbu de is annus setanta–at nau: “E ndi bogat sa cosa de is cratzonis e paríat unu palu de sa luxi cun unu cachi de cincuanta in punta!”
Custa cosa de su “cachi de cincuanta” dd’emu intendia giai de Giancarlo “Su Cavuru”, e intzandus tenemus unus dexi o doxi annus e cun cincuanta francus ndi comperást mesu chilu de cachis.
Sa cosa chi m’iat spantau, candu dd’iat contau a mei, est ca cussu contu paríat contendi-ddu sa primu borta.
Fiat unu contu beciu de prus de trint’annus, ma ddi biíast ancora su spantu e sa spramma in is ogus.
Ma Professori, mancai bonu e masedu non fiat giustu meda de conca.
Fadíat arriri a totus fendi s’ecuilibrista in bicicleta, ma–fendi su togu–a cuddu Cambule nce dd’iat fatu stupai cun sa Lambretta e cussu piciocu est abarrau cussu puru a conca mesu giusta e mesu no.
Ma nisciunus ddu bolíat mali, a Professori–nimancu sa famillia de Cambule–ca issu fiat abarrau pipíu: is Gresientis fiant malus–cuddu cunnu, malus!–ma a genti che issu dda lassánt bivi.
De candu dd’apu connotu deu, Professori at tentu duas staxonis bonas.
Sa primu fiat candu sa bovida de su mercau at incumentzau a ndi calai a conca de sa genti e su mercau dd’ant serrau.
Fiat cosa de arriri sceti!
Totus a foras–carnitzeris, pisciaus e birduraius–in cussas rughitettas strintas a giru de su mercau, a intru de barracheddas strantaxadas in pressi de is operajus de su comunu. Fintzas a nosu “giardinieris” s’iant postu a nci trabballai. Aici pressi meda teníant: is commerciantis fiant ammanigaus beni.
Ma fiat mesi de argiolas!
Axiu teníant cussus carnitzeris e–prus che a totu–is chi bendíant puddas de comperai folla de murta de Professori! Su fragu de sa petza scallendi-si e purescendi-si in sa basca non fiat cosa de aguantai.
Ma non fiat ancora su tempus de is supermercaus chi bendint fintzas pisci friscu e funt postus de aria conditzionada e sa genti bolíat papai.
A chini prus comperát folla de murta prus bendíat e Professori s’at passau un’istadi bona.
S’atra borta fiat candu s’est truncau is cambas.
Immoi non m’arregordu comenti at fatu, ma ge mi dd’at contau issu e totu, ca deu puru femu arricoverau in su “Centro Traumatologico” (arieddas!), ca tenemu s’ernia de su discu.
Narát: “E ita bolis de prus? Mi donant a papai tres bortas a sa di e crocu in unu letu pulíu e callenti: ita bolis de prus?”
Duas dis innanti de paschixedda si nci ant bogau a totus de s’ispidali. E nosu totus prexaus.
A Professori dd’ant lassau innías ca cun cussas cambas ingessadas non podíat fai nudda.
E issu prexau.
Poita ddu tzerríant “Professori” non ddu sciu. Sciu sceti ca non bollu a mi tzerriai a mei de aici!
M’at scritu immoi un’amigu ca a Professori ddu tzerriánt de aici ca fiat de aderus professori de scola. Iat agatau a sa mulleri cun unu piciocu e si fiat postu a fai su perdulariu e de Ude dd’at acabbada in Iglesias.
E anca una borta giovunus de Iglesias–arrobba de galera!–dd’ant acapiau a su monumentu de Quintinu Sella, de cussu arrogu de merda!
