Limba e Madonnas

Castiende custu video de Bentzon mi nde so regordadu de una protzessione innue ddoe fia deo puru.

Tando tenía 5 annos e sa protzessione fit cussa de Nostra Sennora de su Palu Birde (Valverde), sa Madonna de su bixinadu miu (Col di Lana). Candu semus arribbados a s’artária de domo mia, apo bidu a su bixinu de susu, strantaxu in sa porta de domu sua e a tzerrios mannos: “Madonna mia aiutami tu!”

E pranghíat che unu pipíu e pesaíat is bratzos a su chelu:

“Madonna mia, aiutami tu!”

Fit Pascali, su pintore pulliesu chi biviat in sa primu domo de sa palatzina popolare, ma a pranu de susu e po artziare a domo sua ddoe fit una scala a sa parte de sa ruga.

E issu fit in susu de custa scala e pranghíat e tzerriaíat e murigaíat s’aire cun is  bratzos.

Ascurtende is contos de is mannos bellu a bellu aía cumprendidu proita cuddu omine aíat fatu totu cussu avolotu cun sa mamma de Deus.

Sa mugere dd’aíat denuntziadu a is carabbineris, ca issu dd’aíat donada una surra de corpos.

E issu dd’aíat donada una surra, ca dd’aíat scaddada cun su fanceddu.

Fit furriadu a domo innanti de s’ora e iat provadu a aberrer sa porta, ma sa figia fit aguantende-dda e non ddu lassaíat intrare e tzerriaíat a abetare. A sa fine sa figia dd’aíat lassadu e issu aíat intendidu a unu aberrende s’atera porta de coxina. Si fit furriadu e aíat bidu a un’omine currende in sa scala facci a basciu e dd’aíat connotu: fit Gesú Cristu!

Gesú Cristu fit perduláriu e bagasseri e non apu mai comprendidu ita at fatu pro si badangiare cussu ditzu.

Binti annus a pustis, in Iglesias, su contu ddu contaíant ancora: “E est andadu acché is carabbineris e at nadu: ‘Marescia’, mia moglie era con Gesú Cristo’ e su maresciallu dd’at respustu: ‘Ih, beato lei!’

Non mi nde regordu comente dd’ant presentada sa cosa-si sa Madonna de su Palu Birde dd’at fatu sa gratzia o no-ma fatu stait ca issa at perdonadu a issu e issu a issa e nd’ant torradu a bogare sa denuntzia totu de is duos.

A pustis de una pariga de annos sunt emigrados issos puru a Torinu, che a medas in cussos annos.

Is prus giovunos s’ant a domandare: “Ma comente? Issu at denuntziadu a issa?”

Ellus ca no?

L’art. 559 del Codice Penale del 1930 stabiliva che:

« La moglie adultera è punita con la reclusione fino a un anno. Con la stessa pena è punito il correo dell’adultera. La pena è della reclusione fino a due anni nel caso di relazione adulterina. Il delitto è punibile a querela del marito. »

Funt passados ateros 10 annos pro nde bogare custa birgongia dae su coditze penale, e a sa mugere ddi fit andada bene puru ca issu non dd’aíat morta: fintzas a su 1981, si unu ochíat a sa mugere pro motivos de onore, si faxíat 6 annos de galera e fit a postu.

In Sardinnia, custu sutzedíat pagu e nudda, ma Pascali fit pulliesu.

Insomma, cussa fit sa Sardinnia candu deo fia piciocheddu piticu. E deo so pesadu in Iglesias!

In un’ateru arrogu de su film de Bentzon si bident su predi, su maresciallu e su sonadore de launeddas in sa protzessione: is bardias de su connotu.

Mi potzo figurare ca gente meda de sa generatzione mia-o prus betzos- est traumatizada dae cussa triade e ca est pro custu ca arrefudant sa limba nostra.

So faeddende de cussos  intelletuales de manca arrabiados contras a su sardu: non fut unu mundu bellu meda sa Sardinnia innue ddos ant pesados. Ghetant a pari limba e betzumene.

E si pensas ca is prus arrabiados sunt feminas e ex-seminaristas-dd’ischimus totu immoe!-tocat a ddos cumpadesser puru.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: