Esagerende so?

Forsis calincunu s’at a pensare ca su de narrer “disonestos” a is ki sighint a atacare sa LSC comente at fatu Madau est esageradu.

Forsis iat esser istadu megius a ddi torrare sceda in manera educada in su situ de su Manifesto Sardignolo, comente ant fatu áteros?

Non creo.

Non faxet prus a discuter cun gente ki dae 6 annos narat semper sa propriu cosa, fende sa parte ca nemos ddos at mai respustos.

Deo, candu amus cuncordadu cussu compromissu tra linguistica e politica ki si tzerriat LSC, ischíat bene su ki iat a sutzeder in su momentu ca sa proposta iat a bessire a campu.

Pro cussu so stadu deo a proponer a s’Assessoradu de faxer una verifica de sa relata intra de sa LSC e is bariedades sardas de su connotu.

Sa chirca non mi dd’ant cummissionada issos: s’initziativa est partida de mie.

Deo non fia–e non ddu so ne-mancu como–soddisfadu a su 100% de sa LSC.

Pensaía–e ddu penso ancora–ca sa LSC bolíat emendada unu pagu pro nche dda faxer acostare a su sardu de cabu de jossu: insomma, ca tocaíat a dda cambiare cussu pagu ki serbit a permiter pronuntzias diferentes e ca tocaíat a imperare sa X de cabu de jossu, pro cumpensare su sbilanciamentu graficu cara a cabu de susu. Insomma, comente so scriende immoe.

E deo custu dd’apo nadu in Paulilatino, cando apo presentadu sa chirca cosa mia.

Deo in sa LSC b’aíat postu sa firma e sa cara e mi bolíat difender, in s’unica manera letzita, dae is atacos ki fiat seguru ki arribaíant : presentende argumentos scientificos. E custu bolet narrer argumentos ki faxet a verificare.

Apo sfidadu is nimigos de su sardu a verificare si est berus ca sa LSC si nde stesiat dae su sardu de Abbasanta prus pagu de su 90%.

Nemos ddu faxet, ma sighint–e Madau est s’urtimu–a contare sa faula de sa limba artifitziale.

Non mi paret fatzile ki Madau non apat mai intesu de sa chirca mia.

Ma si est berus ca issu non ischit su ki naro deo dae 6 annos tando ddi pedo scusa: non iat esser unu faulantzu, ma peus meda de cussu!

Si est berus ca non ischit ca su sardu de Abbasanta est aici acanta a sa LSC tando Madau est sceti unu ki faeddat proita ca tenet sa buca.

E comente faxet a verificare, non respundet a is obbietziones is cussu sensu ki dd’ant fatu a s’articulu cosa sua.

Sa sua est un’opinone “a prescindere” dae is fatos, duncas ideologica, duncas falsa.

E infatis, totu su discursu suo–bellu sciolloriu de discursu!–est basadu sceti a pitzos de su printzipiu de autoridade: dd’ant nadu “prestigiosi studiosi sardi, linguisti ed antropologi, come Giulio Paulis, Massimo Pittau, Marinella Lörinczi, Giovanni Lupinu Giulio Angioni e Mario Puddu.”

Pagu ddi faxet ca totu custa burrumballa de gente at nadu tontesas! Sunt “prestigiosi” e custu bastat!

Non non bastat! Tocat a narrer si est berus o no su ki naro deo a pitzos de sa relata intra de sa LSC e is bariedades de su connotu.

Aici funtzionat in sa scientzia.

Einstein non bi bolíat creer a sa mecanica quantistica: “Deus non giogat a dadus!”, iat nadu.

Ma teníat tortu, mancari fessit Einstein, e sa scientzia dd’at donau tortu.

E si pones impari totu s’intelligentzia de is “prestigiosi studiosi sardi, linguisti ed antropologi, come Giulio Paulis, Massimo Pittau, Marinella Lörinczi, Giovanni Lupinu Giulio Angioni e Mario Puddu.” non cambias nudda a su fatu ca tenint tortu.

Sa LSC est una bariedade de mesanía: dae cussu semus partidos–e Paulis e Puddu dd’ischint bene!–e tando non est spantu ca assimbigiat aici meda a su sardu de Abbasanta.

Ma totu custu est cosa betza…

Su ki b’at de nou est su fatu ca s’universidade de Tatari bolet trufare a sa R.A.S. faxende cursos de tontesas in italianu a su postu de cursos de curtura sarda in sardu.

Totu custa polemica noa contras a sa LSC partit de innie e su ki bolent est s si nde pigare su dinari–una parte manna de su pagu dinari–de sa lee 26, pro ddu partzire intra de is clientes issoro e–sa cosa prus importante–pro non ddu faxer imperare pro su sardu.

Madau est unu nimigu de su sardu–che Mastino e is áteros Tataresos–e s’interventu suo in italianu in cussu giornaleddu non est ujn’atacu a sa LSC, ma a su sardu intreu. Su ki custa gente non bolet est a ischire ca su sardu est una limba fundamentalmente unitária e ca is bariedades suas sunt “mutualmente intelleggibili”. Su ki non bolent issos est ca su sardu si pongiat in “velleitaria competizione” cun s’italianu. Dd’at nadu craru Lupinu, Prof. Giovanni. S’unica cosa ki apat mai nadu in bida sua.

Madau spapagallegiat…

One Comment to “Esagerende so?”

  1. condivido…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: