Respusta a Massimeddu

Si deo fia stadu unu pagu diferente de su chi seo e sa fonología (o sa carriera academica) mi fessit interessada de prus de su sardu, deo como diat esser unu linguista sardu ki faxet linguistica teorica. Dia scrier de is struturas fonologicas de unu muntone de limbas e fintzas calincuna cosa de su sardu. Si castias in sa tesi de dotorau cosa mia ti podes faxer un’idea.

Ma tando, sa linguistica teorica de unu linguista sardu diat esser linguistica sarda?

A parrer miu, no.

E tando proite diat deper esser literadura sarda sa de Murgia o de Niffoi?

Issos faxent literadura–e si apo cumpresu bene, sa literadura est s’unica cosa ki a Niffoi dd’interessat–e sa literadura issoro est–sighende sa definitzione currente–literadura italiana.

In prus, nen Niffoi nen Murgia sunt pighende parte a su protzessu de su fraigu de sa curtura natzionale sarda.

Issos sunt totu a intro de sa curtura italiana, mancari cun ruolos diferentes e custa est sa situatzione.

Nemos est contestende a Niffoi o a Murgia su fatu ca scrient in italianu: bonu proe ddis fatzat!

Su ki cuntesto deo est sa definitzione de su trabballu de Murgia o de cudd’umorista de Fois ke “literadura natzionale sarda”.

Is trabballos issoro non nde faxent parte nen sighende sa definitzione currente de “literadura natzionale” nen cussa politica.

In cale manera si podet cunsiderare su chi scriet Murgia ke unu contributu a su fraigu de sa curtura natzionale sarda?

Attendo una risposta.

Deo in Acabbadora bido torra is stereotipos italianos a pitzos de is sardos e contados fintzas in italianu.

E deo miga naro ca issa non lu depíat faxer: afarios suos!

Deo naro sceti ca cussa non est literadura sarda: est totu a intro de sa curtura italiana, lampu!

Est unu contu de foxile imbentadu dae is italianos e contadu in italianu.

Ita mi ses chirkende o Massime’!

Massimeddu, tue naras: “Est craru chi si pedis custa libertade [de imperare sa limba ki boles]  non dda podes bogare a chie, fèmina o òmine sardu, bolet impreare s’italianu.”

Oja, Massime’. Aici baratu ses?

Si Murgia scriet sceti in italianu–deu puru scriu in italianu puru–calincuna cosa bolet narrer!

E deo cussos congruos morales e politicos ddos potzo tirare. O est proibbidu?

E is sardos bient ca MICHELA MURGIA, INDIPENDENTISTA, non scriet mai in sardu.

Su Sardu non est tontu, est mali pagau!

Murgia scriet in italianu e faxet literadura italiana.

Unu giuditziu politicu est custu ?

Eja!

Sa definitzione de “literadura natzionale” est una definitzione politica!

E custu sa politica ddu podet faxer.

Su ki non podet faxer est a narrer si una cosa tenet balore literariu o nono. Ma custu non ddu podet faxer nemos!

A mie mi paret prus a prestu ca custa defensa de bosateros de sa “literadura sarda” in italianu bengat dae sa pagu importantzia chi sa lingua tenet pro bosateros in sa definitzione de s’identidade e duncas de sa natzione.

Unu contu est a ammiter–comente fatzo deo–ca s’italianu est presente in Sardinnia e duncas ca bolet atzetadu pro su ki est: limba veicolare.

Un’áteru contu est a ddu ponner ke una de is limbas de s’identidade sarda.

In s’arrexonu tuo–ma non est su tuo solu–mancat sa cuscientzia de su fatu ca s’italianu est ancora fende dannu meda a su sardu e a is ateras limbas de Sardinnia.

E deu seu spantau de custa cosa: comente faxides a non ddu bier?

Non semus ancora siguros si su sardu bi dda faxet a arribbare a sa fine de su seculu e bosateros bolides ponner sa limba de is mortores de sa limba e de sa curtura nostra a su propriu livellu de is limbas nostras?

No, grazie!

Non bos apo a sighire mai in custa strada.

Unu progetu indipendentista ki non ponet s’indipendentzia curturale a su centru de su programma non mi interessat.

Diat boller narrer a scambiare una classe dirigente italianizada cun un’átera classe dirigente italianizada.

Innue est su badangiu?

Diferente meda est sa kistione de is áteras limbas natzionales sardas.

Su de scrier in castellanesu o in gadduresu serbit a stantargiare sa curtura natzionale sarda.

Serbit a stantargiare una curtura antagonista a cussa de unu paisu guvernadu dae sa mafia, dae sa Lega Nord, dae unu manniaciu e–prus che atotu–de unu brusciu postu de gunnedda bianca.

Su ki mi mancat in su progetu de bosateros est custu antagonismu curturale, custu “antiitalianismu” curturale.

Forsis pro a mie est fatzile a faeddare, ca su pagu de italianidade ki tenía dd’apo perdidu dae ora.

Ma deo seo unu produtu tipicu de sa colonizatzione italiana de sa Sardinnia: deo seo unu de cussos disterrados–o profugos– chi sunt sa de tres partes de is sardos.

A mie s’Italia m’at dadu unu sambenadu, unu diploma de peritu chimicu e unu passaportu.

E s’unica cosa ki m’est serbida est su passaportu.

S’italianu a mie m’est serbidu pro imparare s’inglesu e s’olandesu, pro mi nd’andare.

E immoe non ddu faeddo casi nudda.

Anca su miu est unu contu individuale?

No! Est nunu de is contos de is sardos medas ki ant imparadu s’italianu regionale, cumbintos ca cussu fessit italianu, e sunt abarrados frigados.

Su ki mi mancat dae bosateros est sa cuscientzia de su dannu ki s’italianu ancora faxet a is sardos.

Bosateros puru cunfundides s’italianu regionale cun s’italianu standard.

S’italianu ki faeddant is sardos non est su propriu ki imperat Michela Murgia pro scrier.

Ma non l’ischides ca in Sardinnia sa “dispersione scolastica” est a su dopiu de sa media italiana?

E su fatu ca in Sardinnia s’italianu standard non ddu faeddet nemos non nc’intrat?

Innoxe dda serro. Custa respusta est già tropu longa.

E tropu curtza puru.

Ma deo parto dae s’idea ca Massimeddu is trabballos de Elisa Spanu Nivola e Maria teresa Pinna Catte ddos connoschet.

Ma forsis mi seo sballiende.

One Comment to “Respusta a Massimeddu”

  1. De sa iscola amus a chistionare tra carchi chida.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: