Unu tzieddu piticu-piticu (Lotta Continua)

Biviat in cussa masseria mesu sciusciada de is de Corou, in su chi fiat s’oru de Cordilanna de intzandus, in unu de cussus aposentenddus aundi iant biviu is tzeracus de cudda famillia de proprietarius.

In cussa masseria nci passant totus is de Iglesias chi non si podíant permiti una domu comenti si spetat.

Dd’ant agatau apustis de non sciu cantu dis, mesu papau de is topis.

Paríat prus piticheddu puru.

Dd’emu biu sa primu borta aché su chioscu de Pratza Sella.

Emu biu a Giorgi arriendi-arriendi e non cumprendemu ita teníat.

Issu arriíat a buca serrada chentza de si podi firmai e dd’apu domandau poita.

At sprapalluciau is ogus e cun sa conca mi fadíat tzinnu de castiai a s’atra parti.

E dd’apu biu: po si pigai sa tassa de sa birra de su banconi de su chioscu depíat pesai sa manu a s’artaria de is ogus.

Giorgi fiat unu picioconi mannu-mannu, tirát unu metru e otanta e prus e fiat totu musculus.

E si nd’arriíat de cussu tzieddu piticu-piticu.

Su tzieddu si ndi depit essi agatau de calincuna cosa.

S’at castiau cun un’arrisixeddu tristu e at sighiu a si bufai sa birra.

Giorgi fiat de Lotta Continua, ma… “simpatizzante”.

Si fiat postu cun issus candu iant ocupau su “Palazzo Racugno”.

In Iglesias puru iant detzidiu ca fiat ora de fai a biri sa fortza de Lotta Continua e iant ocupau cussu palatzoni sbodiu acanta de sa masseria antiga e mesu sciusciada aundi bivíat su beciteddu piticu-piticu.

A su costau de cussa masseria–17…. ddoi fiat scritu in sa “meridiana” in sa corti–iant strantaxau unu palatzoni legiu e dd’iant pintau a “colori de cani fuendi”, comenti naránt is de Cordilanna.

Forsis est ca fiat aici legiu ca est abarrau sbodiu una pariga de annus.

E is de Lotta Continua, impari a is concurrentis de su “Circolo Comunista Mario Lupo”–ma is de Lotta continua, po si nd’arriri ddus tzerriánt “Circolo Comunista Alberto Lupo”–iant detzidiu de “organizai is proletarius de Iglesias” po dd’ocupai.

Po sa mamma de Giorgi, cussa fiat s’ocasioni po si nd’andai de su maridu, impari cun is fillus.

Ma sa cosa fiat durada pagu: a pustis de una pariga de cidas nce ddus ant bogaus a totus e a Paulu Fanutza–su prus abbistu de su Mario Lupo–nci dd’ant portau a su Bonu Camminu, ma cussu de Casteddu, e nci dd’ant lassau duas cidas.

A is chi iant ocupau is apartamentus de su Palazzo Racugno, su comunu nce ddus at postus in s’uspidali beciu de Santa Barbara e sa cosa est acabbada de aici.

Paulu, candu nd’est bessíu de galera s’est carmau unu pagu, ma a pustis at detzidiu de si ghetai a is surgelaus e immoi est un’omini arricu, mancai ancora de manca.

Giorgi s’est agregau a cussus studentis de manca e, sigumenti fiat bellu che Tarzan, is cumpangias fiant a gara po si ddu coddai.

Fiant puru is annus de su femminismu e duncas si podiant permiti de si coddai a Giorgi e de si fai stimai de su cumpangiu chi teníant giai.

Sceti a Marcu non ddi fiat praxa sa cosa.

Marco puru fiat “simpatizzante” de Lotta Continua e non “militante”.

Marcu andát avatu a Carolina, ma narát: “Lotta continua, eja, ma sempri-sempri no!”

E ddus pigát po culu de aici.

E candu Carolina puru at bofiu tastai da minca de Tarzan-Giorgi, Marcu s’est incatzau nieddu e dd’at mandada a cagai.

A mei mi narát: “Ma nara-mi-ddu tui! Non tenit ni-mancu sa tertza media!”

Po cussu Giorgi si nd’arriíat a scusi de cussu tzieddu piticu-piticu: non fiat tontu e ddu sciíat ca non fiat curretu a si nd’arriri de issu.

In pagu tempus cussu tzieddu si nc’est mortu, Lotta Continua s’est sciusciada, Marcu s’est cojau cun una femina issa puru incorrudada de su sposu e Giorgi at sighiu a bivi aché sa mamma, trabballendi fatu-fatu in Portovesme.

A Giorgi dd’apu torrau a biri una dexina de annus a oi: fiat ancora in domu de sa mamma, mancai portessit giai medas pilus biancus e trabballu in Portovesme non nd’agatát prus, ca sa pigada po culu de s’industria fiat acabbada.

–E ita depu fai? Mi nci depu morri de su famini? Mi iat nau.

Cumpangias de coddai non nci ndi fiant prus, ca fiant totus emigradas e deu mi seu pensau ca cussu tzieddu piticu-piticu, a su mancu, sa birra si dda pagát a solu.

One Comment to “Unu tzieddu piticu-piticu (Lotta Continua)”

  1. Cussu Tzieddu piticu piticu.

    Bella istantanea e potente spaccato d’un momento storico, già universalizzato perché ricorrente ovunque sul territorio che oggi si dice sia italiano.
    Il contrasto fra la grande levatura morale, accompagnata alla stratosferica dignità de su Tziu Piticu Piticcu, fa una terribile ombra al bel giorgino, facendone sparire la insignificante vita, gettata via nella misera rincorsa di improbabili chimere.
    Ci risulta estremamente facile trovare i paralleli del bel giorgino nelle vicende del vissuto continentale di quel periodo, con la triste variante (per il giorgino) che qui le cose sono state sfruttate, ben bene, da tutti gli attori, a proprio esclusivo tornaconto, alla faccia della loro ormai sbugiardata lotta, che pretendeva tutto condividere. Mi vengono in mente certi capanna che intascano la prebenda parlamentare, certi sofri (che almeno si son fatti un pochino in galera) che discettano spudoratamente sui palcoscenici mediatici, certi piperno che ai quali è stata persino accomodata una cattedra universitaria, certi sposini sempre presenti in televisione a stucchevolmente insegnarci modelli comportamentali dagli stessi sempre calpestati, ecc., ecc.
    Si, a ben vedere anche il Bel Giorgino, a fronte di questi nani dai comportamenti miserabilmente egoistici, fa la sua figura da vero Tarzan.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: