Su sardu in sa scola? Sa gente ddu bolet, e is politicos?

In su blog suo, (http://vitobiolchini.wordpress.com/2012/03/11/usare-la-lingua-sarda-a-scuola-litalia-e-leuropa-dicono-che-si-puo-fare-ma-quanti-di-noi-isolani-lo-vogliono-veramente/) Vito Biolchini at postu, unas cantas dies a oe, unu “poll” cun custas preguntas:

“Usare il sardo a scuola?”

Sì, sarebbe un fattore di sviluppo e arricchirebbe i ragazzi  81.31%  (396 votes)  

 

No, sarebbe solo una perdita di tempo e di risorse  17.04%  (83 votes)  

Non saprei  1.64%  (8 votes)  

 

 Total Votes: 487

Est craru ca unu “poll” ke custu non tenet unu balore scientificu in se. Sa gente ki votat si seletzionat a sola e non b’at garantzia peruna ki is ki ant votadu siant representativos de su restu de is Sardos. Epuru, si andamus a castiare su chi nd’est bessidu da sa chirca sotziulinguistica coordinada dae sa Prof. Oppo, bidimus is resurtados sunt is proprios:

Molto d’accordo che un bambino impari l’italiano, una lingua straniera e una lingua locale: (mascros) 82,2 e (feminas) 81,5

(http://www.regione.sardegna.it/documenti/1_4_20070510134456.pdf :pag 59).

Si est una cointzidentzia, est una cointzidentzia stramba meda.

Ma sa cosa prus interessante est ca su resurtadu essidu dae su blog de Biolchini, (immoe, a is 17.32 de chenabura  16 de martzu, 2012) est essidu a pustis de unas cantas dies de–naramus–dibbatitu infogau. Si bosi castiade is interventos, ddoe sunt medas interventos negativos meda contras a su sardu e contras a is ki funt a favore de su sardu.

Custu bolet narrer una pariga de cosas: (1) is interventos contras a su sardu e contras a is ki bolent su sardu in sa scola non ant tentu efetu; (2) s’argumentu ki Lupinu e Lörenczi iant imperau po negare is resurtados de sa chirca sotziulinguistica (“Is intervistados sunt inflentzados dae su clima politicu creadu dae Soru in Sardinnia”) aparent immoe in manera prus ke crara pro su ki sunt: scusas de malos pagadores.

Torro a narrer ca custos datos essidos dae su “poll” de Biolchini podent esser una coitzidentzia, ma si est aici, est una cointzidentzia stramba. Cantas probbabbilidades ddoe sunt ca essant is prorios resultados dae duas inchiestas aici diferentes?

Un’átera cosa ki faet impressione est su fatu ca Biolchini est casteddaju e est connotu de prus in sa zona de Casteddu. Est fatzili ki sa prus parte de sa gente ki bisitat su blog suo siat de Casteddu.

Si est de aici, custu bolet narrer ca sa pertzentuale de Casteddajos ki bolent su sardu in sa scola est arta meda.

Un átera cosa interessante est ca, sigumente is ki bisitant Internet sunt giovunos e studiados e su pubblicu de Biolchini est de siguru unu pubblicu studiadu, is ki ant votadu a favore sunt una pertzentuale prus arta de sa ki est essida in sa chirca sotziulinguistica:

Diploma superiore: 80,7%
Laurea: 69,4%

Est craru ca a pitzos de totu custas interpretatzione non faer a fabbricare unu palatziu mannu meda.

Epuru una cosa faet a dda narrer: si su pubblicu de unu giornalista democraticu, casteddaju, e ki scriet in Internet votat in custa manera, bolet narrer ca una parte manna de su pubblicu prus informadu de sa zona prus “urbana” de sa Sardinnia est a favore de faer intrare su sardu in sa scola.

Custu furriat a su contrariu is congruos fatos dae Anna Oppo a pustis de sa chirca sotziulinguistica: su ki bolent is sardos urbanos, studiados e democraticos non cambiat dae su ki bolent is Sardos de is biddas e ki ant studiadu prus pagu.

Berus est ca sunt passados 5 annos dae sa pubblicatzione de sa chirca sotziulinguistica.

A su ki paret is Sardos sunt semper prus cumbintos ca su sardu depet intrare in sa scola.

Is politicos ita sunt abetende a ddu cumprender?