Deretos tziviles e deretos sotziales de unu populu italodipendente

Su de imparare a distingher is struturas grammaticales de su sardu dae is de s’italianu ita est, unu deretu tzivile o unu deretu sotziale?

Su de pensare a is giovanos ki oe non acabbant sa scola e cras ant a esser disocupados ita est, unu makimine romanticu o realismu?

E su de pretender una chirca manna e seria a subra de sa relata intra de “dispersione scolastica” e limba ki imperant is giovanos de sa scola? Custu puru unu makimine?

Makimine est a si spantare e a s’arrinegare ca is linguistas de is universidades italianas de Sardinnia t’ischint faer s’etimología de unu faeddu e scoberrint fintzas ca su sardu antigu benit dae su bascu (spantu ca non benit dae su catalanu!), ma non ant fatu mai una chirca pro ischire comente faeddant is giovanos sardos?

Proita est ca is linguistas italianos non bolent ischire cales sunt is resultados de s’italianizatzione linguistica de s’Italia?

Non connosco una chirca–una bastet ki siat–a subra de sa “dispersione scolastica” in Italia e sa limba de is giovanos. Epuru sa “dispersione scolastica” in Italia est una de is prus artas de Europa.

Custa kistione in Sardinnia dd’ant afrontada sceti Maria Teresa Pinna Catte e Elisa Spanu Nivola, in is annos Otanta.

Nd’essidu ca sa “dispersione” prus manna est in sa periferia e in is biddas a giru de Casteddu, non is is biddas inue su sardu est ancora biu.

De su trabballu de custas duas feminas mannas non nd’ant fatu nudda.

Nudda is politicos e nudda is linguistas. Cussos puru tenet átera cosa de faer: etimologías, sardu-bascu e áteru bascaramine.

E tando, romanticu est unu ki si spantat e s’arrinegat biende ki is partidos sardos e italianos–innoxe già sunt totus uguales–non ponent sa kistione de sa limba, sa kistione de sa “dispersione scolastica”, sa kistione de su benidore de is giovanos ke unu de is puntos tzentrales de su programma politicu issoro?

“Abbiamo altro a cui pensare!”

Eja, ke is politicos de totu su mundu, is politicos sardos non sunt bonos a pensare prus atesu de is votatziones ki benint.

Totu su ki rikedet  una bisione ki andet prus atesu de cussos tres o batos annos fintzas a is votaziones non ddu pigant in cunsideru.

Ma cale est sa cuntradditzione intra de su pensare a sa disocupatzione de oe e a sa de cras?

Cale est sa cuntraditzione intra de pensare a is probblemas de oe, pensende puru a una solutzione a is probblemas struturales de sa Sardinnia?

Su probblema struturale prus mannu de sa Sardinnia est cussu de sa formatzione de is giovanos: ita benidore boles pro sa gioventude.

Is giovanos sunt sa classe dirigente de cras.

In su benidore bolimus una classe dirigente bilingue–antzis plurilingue, ca su bilinguismu aberit sa conca pro unu muntone de áteras cosas puru–o bolimus una classe dirigente monolingue in italianu porcheddinu?

A nois nos ant pesadu in italianu porcheddinu e un pagu de sardu pro is barzelletas e is faeddos malos e nois semus sa classe dirigente de sa Sardinnia de oe.

Nois semus sa generatzione de is Sardos ki nde tenent birgungia de faeddare in sardu in pubblicu e cun is strangios e oe-in-die cumandamus nois.

Ita presente amus fraigadu?

Ita benidore amus fraigadu pro is giovanos?

Amus fraigadu unu presente de sutasvilupu e de dipendentzia: dipendentzia economica, resultada dae sa dipendentzia politica; dipendentzia politica resultada dae sa dipendentzia psicologica; dipendentzia psicologica resultada dae sa dipendentzia curturale; dipendentzia curturale resultada dae sa dipendentzia linguistica.

Semus unu populu italodipendente.

E bella merda de logu nos semus sceberados ke modellu de “progressu”!

Su ki nd’est essende a 20 annos de sa morte de Borsellino est ki sa classe politica de s’Italia–ma dd’ischiant già totus–est a mesu e pare cun sa mafia.

E nois semus dipendentes dae custa gente.

“Tontos, locos y bien unidos en la locura!”

Deus nos campet dae is Italianos, ma de prus puru dae is Sardos de sa generatzione mia!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: