Tocat a nd’essire dae su ghetu

Giagu Ledda at contadu una pariga de bortas ca sa mugere catalana, cando fit pitzoca, frecuentaíat cursos clandestinos de grammatica catalana.

Fit su tempus de Franco e a frecuentare cussos cursos si riscaíat sa galera.

Un’amiga de Bartzellona, una dexina de annos prus giovana de me, m’at contadu ca issa su spanniolu dd’at imparadu in sa scola.

In domo–una domo burghesa–faeddaíant in catalanu.

Issa puru in su tempus de sa ditadura fascista.

Immoe medas Sardos faeddant prenos de spantu de sa manifestatzione de Bartzellona, inue unu milione e mesu de Catalanos sunt calados in pratza pro pedire s’indipendentzia.

E Adrianu Bomboi faet paragones prus esplitzitos ancora: http://www.sanatzione.eu/2012/09/diritti-ecco-come-protestano-i-lavoratori-catalani-ed-ecco-quelli-sardi/

Sa kistione de sa limba andat impare a sa kistione de s’identidade e a cussa de sa cuscientzia politica de unu populu.

Custu dd’ant cumpresu bene is Italianos, ma is politicos sardos ancora non dd’ant cumpresu.

Custu est su spantu beru, non su de is Catalanos ki calant in pratza.

Labae custa notitzia ki est girende in Facebook:

“A la cherides ischire s’ùrtima nova? Su MIUR at dadu custa risposta a unu collega chi at preguntadu crarimentos pro sa limba sarda in iscola:
“La Spending Review declassa la lingua sarda a “dialetto” sardo, quindi toglie la tutela e i conseguenti finanziamenti alla scuola.

Cordialmente Tiziana Senesi
TIZIANA SENESI
MIUR
Dir. Gen. Ordinamenti – Uff IX
viale Trastevere 76/A
00153 Roma – Italy”

Sa nova est de arisero e benit dae Franca Piras: “L’ultima pia illusione”

Ischimus totus ca is politicos sardos pro custa cosa non s’ant a mover.

Comente non si sunt movidos custos annos pro aumentare su dinari–sa miseria de dinari: 100.000 euro–ki sa RAS spendit pro su sardu in sa scola.

Ne-mancu is movimentos prus o mancu indipendentistas, sovranistas, democraticistas o su ki sunt, si funt mai movidos pro custa cosa.

E sa gente sarda–sa propriu gente ki at decraradu a s’80% de boller su sardu in sa scola, impari a s’italianu e a s’inglesu–si nd’abarrat castiende.

Castiende e abetende ca siat calincuna autoridade a si mover.

Custa deper esser sa propriu gente ki at decraradu de boller s’indipendentzia de sa Sardinnia, in sa chirca de s’universidade de Casteddu e sa de Edinburgh: Lunedì 30 aprile 2012 – unica.it – Università degli studi di Cagliari.

Sa diferentzia intra de Catalanos e Sardos est totu innoxe.

Is Catalanos su chi creent ddu faent puru.

Is Sardos si nd’abarrant abetende ki calincunu ddu fatzat pro issos.

Epuru bi sunt cosas ki non dipendent dae is autoridades.

Su de imperare su sardu cun sa gente disconnota dipendet sceti de noso e totu.

Una cosa pro faer custu passu prus fatzile iat a poder esser a faer mallietas cun scritu: “Su sardu est sa limba de s’amigantzia. Faedda-mi in sardu.” E unu smiley.

E “badges”,  insomma cussas cosas ki s’apicant a sa giaca, cun unu smiley e sa propriu scrita.

Si calincunu si ponet a ddas faer custas cosa, si faet puru unu pagu de dinari.

Cida passada Marcu Murgia nd’at bogau in FB un’idea bona meda:a ponner impari is pipios ki bivent in tzitade e ddos faer giogare e faeddare in sardu, mancari cun personale espertu, ma gioghende e sende impari pro ddos furriare a pitzinnos bilingues.

Tzertu, s’ideale iat esser a ddos faeddare in sardu in domo, ma pro gente meda custu est unu passu malu a faer, pro arrexones medas.

Cust’idea de su grupu de giogu in sardu est una manera pro segare su tzirculu fitziosu inue semus acabbados.

Comente nd’est essidu dae sa chirca sotziulinguistica, su probblema mannu de su sardu est cussu ca casi nemos ddu faeddat in pubblicu e cun gente disconnota.

Is Sardos s’ant fatu s’idea–ki benit dae is traumas sufridos in sa scola–ca a faeddare in sardu siat cosa de maleducados, comente a essire a mudandas in sa ruga.

Tzertu, tocat a sa scola a faer essire su sardu dae su ghetu de sa famillia e de su giru de is amigos, ma sa scola non dd’at a faer fintzas a cando sa politica non dda custringhet e/o si ddu permitet.

E is politicos non ant a faer nudda fintzas a cando non bient ca cun sa limba faet a badangiare votos.

Custu est un’ateru tzirculu fitziosu ki bolet segadu.

Tando cussos amigos ki in custas dies ant esprimidu s’ammiratzione issoro pro su populu catalanu, como depent dare issos s’esempru a is Sardos.

Incumentzade cun cussas mallietas e faeddade in sardu a sa gente disconnota e formade cussos grupos de giogu in sardu.

Custu dipendet sceti de noso.

7 Comments to “Tocat a nd’essire dae su ghetu”

  1. Sa collonizatzione nos at ingiumidu. No est fàtzile a nd’essire; e mi timo chi bi cherfat prus tempus de su chi a sa prima mi fia immaginende.

  2. Un’idea chi m’est bènnida a conca carchi die a pustis de s’atòbiu in Fordongianus. A ti ddu subenis cando cun Massimeddu e Nicola fiamus sètzidos a inghìriu de cussa mesa de pedra, e Massimeddu nd’at bogadu a campu cuss’idea de s’iscola sarda? Beh, b’apo pensadu unu pagu, e mi so naradu: ma su problema beru, s’ùnica cosa chi nos potzat donare nessi una probabilidade de sarbare su Sardu, est sa de dd’imparare a is pipios, mescamente is chi sunt in edade pre-iscolare. E tando, proite non fraigamus unu “asilu nidu” sardu? Bògio nàrrere: unu cale-si-siat nidu (privadu: is pùbblicos giughent postos limitados e non ddoe at logu pro totus) costat meda. Naramus chi faghimus una chirca pro istabbilire cale est sa mèdia de sa reta mensile de custos asilos in (ponimus, che esèmpiu) Casteddu: s’àsilu nidu sardu ti diat pòdere fàghere gastare bellos 100 èuros de mancu de sa mèdia. In unu asilu nidu b’ant a andare pipios piticos meda (fintzas prus pagu de un annu, a bias): ite ddi sutzedit a unu pipiu chi tenet un’edade dae (ponimus) 8 meses a 3 annos (chi cumentzat a èssere bastante matucheddu pro intrare in sa materna) si ddu esponimus a fitianu a una limba? Pensamus·nos·ddu: pipios de cuss’edade chi is maistras ddi allegant in Sardu dae mangianu a merie onni santa die, ddos faghent giogare in Sardu cun is maistras e (cosa de prus importu galu) intre de issos etotu, ddi donat a papare alleghende in Sardu (“e chie si dda màndigat custa minestra bona? Frantziscu!”, “ite bona chi est custa petza! E sa pistinnaca? Chie si dda papat?”, “custa pro chie est? Pro mamma? Pro babbu? Pro ajaja?”, e aici sighende)… di faghent impreare su Sardu che limba normale, insomma si ddu imparant. E una borta chi a unu pipiu aici piticu dd’as imparau su Sardu… beh, mancari in domo non s’allegat, su “dannu” est fatu: essint bilìngues. E non chistionemus, poi, de su fatu chi a is babbos e mammas si ddi donat documentatzione iscrita in Sardu, faghende a manera chi issos puru siant custintos a fàghere cuss’isfortzu. Tzertu, sa cosa mègius diat èssere su de ddu fàghere torrare in domo, su Sardu, chi siat sa famìlia a si dd’imparare su Sardu a is pipios: ma su Sardu nch’est essende (essidu?) dae domo, e tando… a mali estremi, estremi rimedi!

  3. Marco, diat èssere de proare, si no àteru si diat pòdere sperimentare cantos diant adduire a mandare sos fìgios a unu asilo pro piseddutzos ischende chi sas mastras lis faeddant in sardu.

  4. Roberto, iscusami unu pagu pro s’OT: in LSC ses iscriende? No, proite deo soe Gaddhuresu e-i gaddhuròfonu e app’imparau sa limba Logudoresa dae sos lurisincos e-i dae sos iscanesos. E su Campidanesu puru, dae nonna mea (dae sa parte ‘e mama mea) ch’este asseminèsa nàschida in S. Giovanni Suergiu. E acato, in custa Limba, Campidanesu e-i Logudoresu impare. Deo soe pitzinnu galu e no la connosco meda, sa LSC. Ma custa mi paret LSC.

    Pro cantu pertoccat s’articulu, soe de acordu cun a tie; ma cun Marco e Nanni puru. Sa Limba s’at a imparare a sos pitzinnos cando sunt minores meda. Ma no lu pessas chi, a pagu a pagu, sa limba itagliana l’amus a bogare? Chelzo narrer: pro cantu nos at a servire, si si faghet, su bilinguismu?
    Su chi chelzo fagher eo, a cando appo a tènnere familia, este de imparare a fizos meos a faeddhare totu sas limbas sardas. A dommu amus a faeddhare in Sardu, ma s’iscola puru devet cambiare. Ca si no, si sa Limba er discriminada a s’iscola, sos pitzinnos ant a faeddhare a continuu in itaglianu a sos sardos disconnotos. Ammentadi ca simus galu isclavos de un’iscola chi si detzidet in Roma. E birgonza puru este su ch’at fatu sa Cassatzione itagliana a sa Limba Nostra. E su problema si giamat propriu “istrutzione tzentrale”: nos imparant su “Risorgimento” (cussas faulas pro nos creschere itaglianos) e no nos imparant sa Revolutzione Sarda de fine ‘700 e de comente ant mortu a Ciloccu (mortu pro manu itagliana); nos imparant a ue s’acatat su “Monte Grappa” e peroe no connoschimus a ue este “Monti Pulchiàna” o su “Riu Turràli” (su chi si giamat gai proite arribat a sa Turra ‘e Vignola) o “La Conca di Lu Frati”.
    App’ischidu puru chi ant postu, a s’iscola itagliana custa “ora obbligatoria di Costituzione e Cittadinanza” (http://www.manca-indipendentzia.org/ita/organizzazione/comunicati/item/324-marcette-coloniali-obbligatorie-a-scuola.html). S’àteru problema sunt medias e-i giornales de propaganda itagliana. E comente faghimus, a los frimmare?

    • Cumplimentos medas pro su sardu! Ddu scries bene meda! Su ki scrio deo est sardu de Iglesias, ma scritu in manera unitaria. Insomma est una LSC emendada pro tenner prus elementos de cabu de jossu. Bi sunt 4 cosas ki cambiant. 4 ebbía. E comente faemus a ddos firmare? Non faet e non ddu depimus ne-mancu boller. Su ki si serbit est a faer connoscher sa limba e sa storia nostra a is pitzinnos. E custu ddu podimus faer nois puru, mancari chentza de scola, a su mancu unu pagu. Internet est già cambiende medas cosas.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: