Respusta (mesu) indireta de Giuliu Calvisi

S’On. Giuliu Calvisi at scritu custa respusta in su profilu de FB de Marco Solinas.

Dda pongio innoxe, ca est direta a me puru.

Cras, a conca frida, dd’apo a torrare sceda deo puru.

(Giulio Calvisi) Ciao Marco, pustis de s’approvatzione de sa letze de Rendiconto e Assestamento, chirco de risponnere a sas criticas de su Bolognesu, e de atteros, supra custa delibera de sa Commissione Bilancio chi aeddat de sa Carta Europea delle Lingue Regionali o minoritarie.
Su Bolognesu pero’ mi picat a malas paraulas. An iscrittu: A Calvisi non gliene frega una mazza del sardo, meno ancora dei diritti dei Rom e Sinti… tres o battor dies fachet aian iscrittu offesas senamentas prus mannas. Dispiaghet a leghere custas cosas, vintzas si non b’at nudda ‘e veritate, ca est che a ponner in discussione, a sos ocros de chie non ti connoschet bene, s’identitate tua, su chi ses e su chi ses istatu. Ite cheres però: custos presuntos tutores de sas raichinas sardas gruspini venenu prima e pustis aeddana, comente an imparatu prima dae Berlusconi e como dae Grillo. Jeo so unu sardu de raichinas vithichesas, naschitu in Olbia dae una famiglia de pastores. Appo murtu erveches dae canno aiappo treich’annos finas a sos decheotto, duas vias de sa die, pascas de Natale o de aprile cumpresas. Murghiappo a imperriatura, a manos e chene mungitrice e bintzas chene tettoia supra sa conca. Proenne, vroccanne o a cara a bentu non aiat importantzia. Aeddo su sardu vithichesu, sa limba de mama, e s’italianu l’appo imparatu in iscola. Chin frates meos, chin thios e thias, chin meta vratiles e ghermanos non appo mai attu un’arrejonu in italianu, mancu mesu paraula.E custu Bolognesu ti descriet comente unu continentale remitanu, mancari chie at iscrittu narat a mie continentale ed est una pessone chi no ischit murghere mancu una ervecche o non ti la distinghet dae su cane pastore. Vintzas custa cosa supra de sos Rom e de sos Sinti m’offennet paritzu. Dae su 1997 a su 2005 so istatu responsabile immigrazione a livellu natzionale de su partitu Ds, e tanno appo travagliatu meta chin sos Rom e chin sos Sinti. Appo sichitu, in prima pessone, sas chistiones ligatas a su Casilino 900 (su campu nomadi prus mannu d’Europa) canno s’achiant sas espulsiones illegales.
A d’onzi modu, so de accordu chin Mario Carboni, de su comitatu de sa limba sarda, isse puru m’at criticatu duramente, ma chene offennere pero’. Isse m’at natu chi sa polemica est su sale de sa politica. Oje su Bolognesu, i s’articulu “Gli errori di Calvisi” iscriet cosas chi annan a su particulare e chi meritan una risposta ispetzifica e pretzisa, chi l’appo a dare pustis de s’approvatzione de su Rendiconto e de s’Assestamento.
Unu crarimentu però lu cheglio dare derettu. Sa Commissione Bilancio canno deliberat (“in sede consultiva” si narat) supra de unu provvedimentu de un’attera Commissione (in custu casu sa Commissione Esteri) non devet facher ragionamentu de meritu, antzias mentzus, non lu potet fachere. Devet solu acher unu carculu contabile, comente unu ragionieri. Si su relatore devet narrere cosas de meritu, non devet facher su relatore. Pro narrere sas cosas de meritu devet annare i sa Commissione Esteri o potet aeddare in aula, presentanne sos emendamentos chi cheret presentare. Gai cheriamus achere chin sos atteros deputatos sardos de su Pd. Caterina Pes est sa collega chi pro nois ata sichitu su provvedimentu dae s’incumintzu. Sos emendamentos son prontos. Nois pessamus chi vintzas in custa Carta su sardu deviat essere cussideratu mentzus. Custa discussione chin sa delibera de sa Commissione Bilanciu non b’intrat nudda. In cussa delibera jeo appo postu una chistione chi aiat postu su Servizio Bilancio. Si non l’aio posta jeo, l’aia fattu su Presidente o su Guvernu matessi, o un atteru deputatu. Ca sa cosa est goi: canno su Servizio Bilancio narat chi b’at problemas de copertura finanziaria, devimus dimannare a su Guvernu crarimentos.E gai amus fattu. Est una cosa chi non si potet cuare. Nois poi no amus fattu, comente mi paret pessat su Bolognesu, una delibera chi nat: su Bilanciu italianu non juchet su inari pro approvare custa letze. Nois amus natu: in custa letze b’ata normas chi poten costare, atzes postu su inari? Mi paret una cosa diversa e mi paret vintzas una cosa justa. Jeo pesso chi si una letze ponet dirittos pro sa zente, bi devet essere puru su inari. Ca si mancat su inari enini mancu sos dirittos matessi. Su Bolognesu i s’articulu de oje ponet in discussione sa ricostruzione contabile de su Servizio Bilancio. Pesso chi irbagliat pero’, prima de risponnere, pico s’impignu de approffunire puru sa ricostruzione issoro, isperanne mancari chi lessen sas malas paraulas.

One Comment to “Respusta (mesu) indireta de Giuliu Calvisi”

  1. Su Giulio Calvisi chi apo connotu cando istudiat in tatari cando bi fia deo, no ischiat nàrrere mancu una paràgula in sardu.
    So cuntentu chi apat imparadu como, a mannu. A iscrìere, galu iscriet unu azigu gasi comente si narat, ma si podet nàrrere chi at imparadu bene su sardu. Ma devet èssere istadu a pustis de sa laurea.
    Isperamus chi cumbincat su PD a pigare in cussideru de sessare sa gherra contra a sa limba sarda, como chi issu puru est intradu a parlamentu.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: