Tomata olandesa

023 (2)-2

Is cummentos de Andria Maccis a s’atru articulu m’ant fatu cumprender sa diferentzia ki b’est intra de sa bisione de sa Sardinnia ki tenet unu disterradu e unu ki est abarradu innie.

Deo bido is cosas de atesu e mi perdo is detallios, ma bido puru su cuadru intreu.

E in prus connosco bene cus’ateru logu–logu strambu–ki si narat Olanda.

E fatzo paragones.

S’Olanda est su logu ki esportat prus tomata in totu su mundu: De grote EditieNL tomatentest – EditieNL – RTL.NL

Comente faxent?

Sa tomata dda produsent in serras callentadas e allugadas.

Totu cosa ki costat meda.

In Olanda, est craru, su de produser tomata costat, in se, de prus meda ki non in Sardinnia.

Ma est craru ca unu kilu de tomata olandesa depet costare prus pagu de unu kilu de tomata sarda, sinono non iant a esportare aici meda.

Tando innoxe bidimus ca totu cussa richesa ki is Olandesos produsint cun sa tomata non benit dae su clima o sa calidade de sa terra.

Benit sceti dae su fatu ki is Olandesos su mestieri de produser e … BENDER tomata dd’ischint faxer.

Una bintina de annos a oe sa tomata olandesa faxiat schifu.

Fint già is espertadores prus mannos d’Europa, ma is tedescos tzerriaíant cussas tomatas “bombas de abba”.

In cussos annos apo bidu un’articulu in su giornale, inue si lamentánt ca in Olanda esistíant sceti duos tipos de tomata e mala puru.

Funt passados prus pagu de 10 annos e immoe totu is tomatas noas ki esistint non sceti s’agatant innoe puru, ma totu su semene benit propriu dae s’Olanda.

Eja, su semene de sa tomata ki comperades in Sardinnia benit dae s’Olanda.

Si sunt postos universidade e impresas privadas e in giru de pagos annos ant cambiadu su mundu de sa tomata.

E custu mancari su clima de s’Olanda est su ki est.

Est sa gente ki contat pro produser richesa.

S’Olanda est rica proita ca b’at connoschentzia meda e difusa.

Sa Sardinnia est manna ke s’Olanda, ma tenet 10 bortas prus pagu abbitantes.

Su clima est mellus, ddoe est logu meda pro faxer tomata, ma is Sardos tomatas non nd’esportant.

Poita?

Poita est ca sa Sardinnia est pobira e s’Olanda est arrica?

Deo custa pregunta mi dda fatzo donni die.

8 Comments to “Tomata olandesa”

  1. Proite s’Hollanda una economia la tenit. Nois Sardos, mi paret chi nono.. :-\
    Nois comporamus fintzas su trigu, a die de oe!
    E sa conca de sa zente puru contat, s’istudiu de sa propriu terra… cosas chi tue etotu naras donzi die. O nono?

  2. Sa tumata costas de prus a la fàghere in Olanda ma nois pagamus de prus pro totu su restu, a comintzare dae s’abba. Ma as resone puru tue, nois no amus universidades chi istudient pro nois, e cussu ca nanchi sa facurtade de agraria de tatari s’apat fatu nomea.

  3. Tando fortzis sos olandesos sunt prus intelligentes de sos sardos?
    O b’at àteros elementos chi non si sunt cunsiderende?
    S’Africa est rica meda de onzi bene de deus…ma sa zente est pòbera…pro ite?
    S’ Sardigna est in d-una situatzione meda prus a curtzu a sas colonias de s’Africa (ma meda) chi no a s’europa de sos colonizadores (olanda pro prima).
    Fortzis pro cumprèndere custas dinamicas economicas depimus proare a pensare a sa Sardigna comente a sa colonia africana de s’italia e non comente a parte de s’europa…

    • Non sunt prus intelligentis: tenent un’aparadu statale ki funtzionat e impiegados pubblicos ki sunt a su servitziu de sa gente.
      E so de acordiu cun tue ca sa situatzione sarda asimniget de prus a sa de una colonia, ma immoe sa Sardinnia est autocolinazada da sa burghesia compradora italianizada e italiana.

  4. Ddu biis? Giai nosi praxit de prus candu scriis aici.

    Non pensu chi agatis a nemus chi ti potzat nai ca non est berus su chi as scritu e nemus ti dd’at a nai.
    E non pensu chi nemus de nosu sardus t’at a nai mai ca non dd’iat a praxi a essii arricus che s’Olanda.
    E po fintzas togus che is olandesus😉

    Su chi naras tui e ca nosi depeus ponii in pari a circai de fai ameliorai sa cosa, ma cumenti depeus fai non ddu naras mai. E invecias ddu ias a podii nai, po ita ca nc’at sceti duas maneras :

    – in pari, circhendi de agatai una manera po acuntentai a totus in su chi fait;
    – pratzius, cun calincunu chi fait su barrosu e chi si segat po fintzas casu narendi a is aterus ca funt callonis o ca funt nimigus, sceti po ita ca non dda pensant che issu.

    Sa primu de is duas est stentosa e trabballosa ma portat gosu a totus, sa secunda est prus lestra ma portat gosu sceti a chini cumandat.

    Nosu sa parti nostra de ndi cassai scucadas dda teneus giai passada, sendi ca nos’ant nau ca seus italianus.
    Si puru a essii sardus bolit nai a ndi cassai scucadas e a ti fai nai ca ses unu calloni o unu nimigu est mellus a abarrai italianus …

    • Su chi depeis fai? Cussu si ddu scoviu candu mi poneis che Rei de sa Repubblica Sotzialista de Sardinnia!
      Unu milioni de euro a s’annu.
      E seu baratu puru!

      Dd’apu nau medas bortas: tocat a strantaxai una classi dirigenti chi pensat in sardu.
      Nci bolit a su mancu una generatzioni.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: