Corrudos e cullionados

319

Su mundu de sa limba e cussu de s’indipendentismu non cointzident.

A una manera custu est unu bene, ca su cuscientzia linguistica depet abarrare unu bene e unu balore trasversale, non acapiadu a una parte politica.

Ma su propriu, sigo a narrer ki un’indipendentista ki scriet e faeddat sceti in italianu est un’indipendentista “all’amatriciana”.

Insomma, sa simbula de is macarrones at esser puru sarda, ma sa bagna est italiana: malloreddos “all’amatriciana”.

A me su mandigu “fusion” mi andat fintzas bene: deo is contaminatziones non ddas timo.

Su ki non mi andat bene est ca su sardu est morende-si-nche.

Deo non apo mai teorizadu su monolinguimu in sardu–est roba de macos sceti a ddu narrer–ma is Sardos sunt andende cara a su monolinguismu in italianu (porcheddinu).

E non bi bolent analisis sotziulinguisticas pro ddu cumprender: bastat a si castiare a giru e a ascurtare.

Su sardu est bellu ke sparessidu dae sa ruga.

Custu at portadu una parte de is indipendentistas a teorizare s’italianu ke limba natzionale de is sardos, “ca immoe est una de is limbas de is Sardos”. .

E is áteros indipendentistas paret ki s’italianu non ddu timant.

In cuss’area paret propriu ki nemos si nd’acatet ki s’italianu si nch’est ingurtende is limbas sardas,

In Facebook essint trumas noas indipendentistas–s’urtima ki apo agatadu est CAMMINARE INSIEME VERSO L’INDIPENDENZA–e scrient in italianu.

E si ddi faxes bier sa cuntrad-ditzione si chesciant puru e ti nant mancari, ki issos su sardu non dd’ischint, comente ki custa fessit una rexone bona e giusta,

Bi sunt indipendentistas medas ki non cumprendent ki pro unu sardu ki tenet cuscientzia, su de faeddare e scrier in sardu est unu doveriu tzivile.

Mi so cumbinchende semper de prus ki s’idea de sarvare su sardu e de ddu furriare a limba normale non andat impari a su programma politicu de is indipendentistas.

Custos o ant atzetadu s’italianu ke limba natzionale o s’abetant ki su sardu torret a biver–a pustis de s’esser mortu–candu arribbat “il sol dell’avvenire” de s’indipendentzia.

Is de RegReS custa cosa dd’ant teorizada: su modellu issoro est s’Irlanda e ddu nant craru.

Ma is áteros sunt peus puru: non teorizant nudda, ma camminant su matessi cara a sa morte de su sardu.

Tontos.

Tontos, ca bolent sa “Repubbrichedda italiana de Sardinnia”.

Tontos, ca non cumprendent ki indipendentzia kentza de identidade non nd’ant a tenner mai.

Is Irlandesos teníant un’identidade catolica e pro cussu sunt abarrados diferentes dae is Inglesos.

E s’indipendentzia issoro ddos at furriados a colonia-culu-a-terra de su Vaticanu, inue cumandaíant is predis e fintzas pedofilos.

Bette modellu ki si sunt sceberados!

E tontos, ca non bient ki in custa situatzione de monolinguismu italianu a issos non ddos votat nemos!

Su ki nd’est essidu dae custas votatziones urtimas est craru: ne-mancu su 3% de is Sardos at votadu indipendentista, sovranista o autonomista.

Is Sardos sunt colonizados e callonizados e votant Grillo e is áteros partidos italianos.

Is indipendentistas sunt abarrados corrudos e cullionados.

Ma ancora non bolent cumprender ki custu andat impari a s’alienatzione linguistica e curturale de sa Sardinnia.

In bonora ki andent.

A su mancu immoe ischimus ki non podimus contare a subra de issos pro sarvare su sardu.

E pro arribbare a s’indipendentzia linguistica e curturale–e duncas politica–tocat a nosi chircare áteros interlocutores.

2 Comments to “Corrudos e cullionados”

  1. Su peus de meda indipendentistas “all’amatriciana”, pro la nàrrere comente Roberto Bolognesi, est chi teorizant s’innoràntzia de sa limba sarda, teorizant in definitiva sa mandronia issoro e de chie los sighit, a si pònnere a istudiare sa limba de sa terra chi cherent indipendente.

  2. Saludu Robe’ – eo no dio esse’ gasie resolutu subra custa chistione ch’hamus allegadu eri sera. In bona cungruida tue naras chi si unu est indipendentista devet connoschere e iscriere in sardu. Torrende a su titulu inoghe, mira chi “Corrudos e coglionados” lu semus dae sa notte ‘e sos tempos puru connoschende e faeddende, pius o mancus tottus, su sardu. Anzis, ti naro ‘e pius, sos chi ‘eniana dae fora ( Colonitzadores ) no fini andados a logu sisse no hasserene happidu dae sa parte insoro sos COGLIONADORE nostranos ( de sambene nostru) chi faeddaiana meda ‘ene su Sardu ( in cantu a l’iscriere no creo …). Como eo naro, benennidos siana sas trumas de zovanos chi no s’affogana de islogans de su cazu, ma algumentana connoschende, fattendesi cumprendere e dendene notscia in impostos de altu cunsieru; ed est unu Faghere ( no ciavanare) chi portana ad unu indipendentismu de AZIONES chi podes palpare a manu. Cussos chi a Cargeghe hana primmu manifestadu e poi hana postu s’amministrazione in gradu de dliberare e che frundire su solitu imboligu de ettaros de ponnere a panellos termoelettricos, lassende cussas terras destinadas a pastorizia, agicultura, viticultura, zootecnia; cussos giovanos, maccari faeddaina s’Italianu, ma hana fattu n’zione vera de indipendentista. Chelzo narrere, cussa ‘e sa limba, no podet leare sa cara estremistica che zerta rligione. Penso chi siet torrende cun provettu; a passos minores ma est torrende. Abbaidadi como chi che la son ponzende in sas iscolas. A pagu pagu sa Limba est leende cara in logos ue no bi fit mai istada primmu ‘e oe. E cungruende no creo chi unu veru indipendentismu no est de cunsiderare sisse noe LIMBUDU in sardu. Unu saludu caru

    P.S. bidu has tue inoghe coment’est. Est totu in inglesu ed eo no nde cumprendo una peraula. Comente catzu fatto a t’ispidire como cant’happo iscrittu ?!?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: