Ddoi at genti chi esistit sceti po si ndi fai arregordai cantu femus tontus nosu Sardus, innantis de sa revolutzioni curturali incumentzada de Su Populu Sardu e de Mialinu Pira.
“La Regione #Sardegna stanzia 10 Milioni di euro per la lingua sarda! Ma per far crescere la nostra economia e per rendere competitivi i nostri giovani nel mercato del lavoro è più utile promuovere il sardo o l’inglese?: “https://www.facebook.com/riformatorisardi
Custus funt abarraus a 40 annus fait, ancora arrexonendi de “aut aut”, a su postu de “et et”, fendi crei ca tocat a scioberai intru de inglesu e sardu.
Lassendi stai puru ca cussus 10 milionis funt pratzius in tres annus e funt ancora sa cifra prus bascia de totus is spesas de s’assessorau a sa curtura.
Tocat a nai una cosa: custus “Riformatori” tenint a su mancu s’atza de non sighiri sa moda de su momentu.
Si fait a nai de aici.
Is candidaus a is votatzionis regionalis chi benint, ndi funt bessendi–unu avatu de s’atru–cun su chi bolint fai po afortiai su sardu, ma custas concas nobbilis ndi bessint cun custa cosa de s’inglesu.
Comenti chi in Sardinnia non si spendiat giai unu sciascíau de dinai po s’inglesu, ma chentza de biri resultaus.
Deu creu chi is atrus candidaus ant fragau su bentu e–lassendi a una parti sa chistioni de sa bona-fidi–ant cumprendiu chi sa genti bolit lingua sarda , identidadi e annoamentu de sa classi dirigenti.
Sa crisi de sa Sardinnia est una crisi totali: economica, sociali e duncas curturali puru.
Is Sardus ant cumprendiu chi est totu su “modello di sviluppo” chi s’at impostu s’Italia chi bolit cambiau.
Custus “Riformatori” fragant atra cosa in su bentu chi est tirendi.
At essi po custu chi non contant una cibudda?