Unidos?

bandera2

Sabudu si funt atobiados is leaders indipendentistas pro chircare de agatare sa manera de si ponner impari.

Custa est cosa bona e giusta, ca unu movimentun indipendentista forte serbit a totus: indipendentistas e non indipendentistas.

Is italianos–comente amos bidu custas dies–cumprendent una cosa sceti: sa fortza.

Pro custu ant sceberadu una fae a buddíu que presidente de is sardos.

Don Abbondio–si cheríat–podíat firmare sos giogos de guerra, ma non est in cussu postu pro de badas: bi dd’ant postu is italianos pro faer su qui bolent issos e issu cussu faet.

Tando: unu movimentu indipendentista forte…

Lampu!

Iat esser cosa bona e giusta.

Ma bastat a ponner impari a is leaders pro arribbare a carqui cosa?

Comente amus imparadu a is elementares sa somma zero + zero = zero.

Custos balent zero virgola: mellus de nudda, ma non bastat.

Como forsis si bolent ponner impari.

Cosa bona e giusta, lampu!

Mi ddu bido a Gianfranco bufende impari a Mauretto!

Insomma, pro si ponner impari–fatos a indipendentistas–bi queret carqui cosa in prus de una tassa de binu.

Indipendentistas bi nd’at de manca, de tzentru, de dereta e de atéra genías puru.

Est giustu qui siat aici, ca, si sa natzione est una, is interiossos de unu populu non funt totus uguales.

Su qui cumpartzint is indipendentistas est s’idea de arribbare a unu stadu sardu.

Creo qui donniunu siat de acordiu cun custu.

Ma b’est un’átera cosa puru qui is indipendentistas tenent in cumone: su de non tenner idea de comente b’arribbare a cussa repubbrica sarda.

E cun s’atobiu de sabudu dd’amus torradu a bier: faeddant de comente si partzire sa leadership, ma non tenet idea peruna de comente cumbincher sa “metade prus unu” de is sardos a sceberare de lassare s’Italia a is italianos.

Bolent totu faer que a is italianos: a primu faimus su stadu e a pustis amus a faer sa natzione.

Ej’e’!

Lastima–e mancu male!–ca non tenent bajonetas.

Su sardu non est tontu: est malu a cumprender!

Insomma: sunt abetende su spantu de bier custa “metade prus unu” de is sardos qui, a sa sola, si cumbinchet a andare infatu issoro.

Aspetta e spera.

Mancari si pongiant impari…

Sunt gai fissados cun su stadu e sa repubblica sarda, ca non pensant ca su stadu est sceti s’organizatzione de su podere a intro de una natzione.

E sa natzione ita est?

Calincunu de custos leader–a su mancu fintzas a pagu–de natzione non nde bolíant intender.

Áteros faeddant de natzione, ma sa “natzione” issoro forsis creschet in is fundos de pira: fenomenu naturale!

Nemos paret qui cumprendat qui sa natzione est una tecnologia sotziale qui una classe dirigente ponet in pratica cando bolet esser sa mere de su distinu suo in terra sua.

E tando: esistit sa natzione sarda?

A dolu mannu, tocat a donare arrexone a Milieddu Lussu.

Sa natzione sarda non esistit, bolet ancora fata.

E inue est su programma de custo leaders mannos indipendentistas pro stantargiare sa natzione sarda, s’unica qui podet arribbare a unu stadu sardu?

In perunu catzu de logu.

Bolent fraigare sa domo incumentzende dae sa crabetura.

Auguri e figli maschi!

E custu non est s’unicu probblema.

Si custos omines mannos si bolent ponner impari, bi podent renescher sceti si agatant unos cantos puntos cuncretos qui bolent totus.

Apo bidu ca già sunt pongende lacanas e cunditziones.

Insomma, deo pagu bi creo a custos omines mannos…

Ma un’interessiu in cumone ddu tenent totus: su fraigu de sa natzione sarda.

Si de aberu si bolent ponner impari, bastat a tenner unu programma in cumone pro definire sa bia pro arribbare a s’indipendentzia.

E cussa bia est una sceti: su fraigu de sa natzione sarda.

Nudda natzione? Nudda repubblica!

E comente dda stantargias una natzione?

CUN SA CURTURA NATZIONALE!

Ello? Cun is bajonetas?

E tando, custos omines mannos depent narrer su qui bolet fatu pro su qui pertocat

  1. sa lingua: LSC? LSC emendada e medas pronuntzias? Duas normas? E is limbas de Sardinnia qui non funt parte de su sardu?
  2. sa limba in sa scola: cale bariedade de sa limba bolet imperada in sa scola? E bi bolet unu programma de impreu de su sardu a livellos diferentes in situatziones diferentes. Insomma: serbit una programmatzione linguistica.
  3. serbit unu progetu de impreu de su sardu in sa scola, que lingua veicolare, pro s’imparu de sa storia, de sa geografia e de su connotu.
  4. Serbit unu progetu pro símprenta de libbros sardos in sardu, pro sa musica, pro su tzinema, pro internet.

Tando: serbit unu progetu curturale pro fraigare sa curtura natzionale sarda, duncas sa natzione sarda.

Custu obietivu podet aunire totu is indipendentistas: de manca, de dereta e de casinu puru.

Si arribbant a custa unidade nosi ponimus in sa bia pro arribbare a su mancu a s’indipendentzia curturale: su portale de totu is indipendentzias.

Si sunt pensende qui bastet a ponner impari bator concas de minca narcisistas pro arribbare a s’indipendentzia, tando tantu balet qui sigant a chertare.

Pro un’analisi una pagu–ma pagu–diferente: http://cagliari.globalist.it/Detail_News_Display?ID=124524

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: