Sardos ratzistas?
E proita no?
Bido in Facebook reatziones de spantu pro is cummentos ratzistas de Sardos contras a su ministru italianu Kyenge: unu pro totus: https://www.facebook.com/notes/michela-murgia/a-proposito-della-presenza-di-cecile-kyenge-a-cagliari-con-il-papa/10151677050728347
Su de pensare ki is Sardos podíant esser immunes dae su ratzismu, cussu emmo est ratzismu: e ita semus, una ratza superiore?
Su ratzismu est fisiologicu, deo creo ki esistat in donniunu de noso.
Dd’apo agatadu fintzas a intro de me e totu.
Non m’at fatu praxere mancu po nudda, ma non mi nde so negadu.
Comente incumentzant is arrexonos ratzistas?
–Deo non seo ratzista, ma…
Deo, a dolu mannu, tengio una parte legia in conca mia e custa parte cuntenit puru su tantu suo de ratzismu.
Malu meda a ammiter pro unu ki est stadu, issu e totu, unas cantas bortas vitima de su ratzismu de is áteros.
Bosáteros no, annó?
Bosáteros su nimigu a intro non ddu tenides?
E cando su ratzismu pesat sa conca est una pelea pro non ddi faxer conkistare sa parte ratzionale de su cherbeddu.
E casi semper bi dda fatzo a bincher, ca tengio una curtura antiratzista e–cosa de importu prus mannu puru–non mi dda passo male pro kistiones de dinari e pro is áteras kistiones puru.
Semus totus ratzistas, comente semus totus assassinos potentziales.
Si custu non dd’ischis, tando eja ca ses in perigulu de ti perder.
E tando ita b’at de si spantare biende ca una minoría de gente pagu abbista e/o inniorante, in una positzione sotziale bascia e debbile, est cuntenta pensende ki bi siat gente ki est prus pagu de issos.
Nemos bolet esser in s’urtimu gradinu de sa scala sotziale.
In is annos Otanta de su seculu passadu dd’apo bidu naschende su ratzismu, in Iglesias.
Su ratzismu contras a is nieddos bogio narrer, ca s’atru–contras a is Rom e contras a is “gabillos”–esistíat dae semper, ma nemos ddu tzerriaíat de aici, ca fiat cosa de casi totus e nemos dd’amitíat ca fiat ratzismu.
Fiant is cumpangios de trabballu prus male-pigados a s’acanire contras a is nieddos e a is marokinos (is ambulantes) e contaíant contos de domos donadas a issos a su postu de ddas donare a is Sardos e is contos ki is ratzistas contant in donni logu–in Olanda puru–pro giustificare s’odiu issoro.
Custu ratzismu est fisiologicu: in donnia populu ddoe at esser semper cussu 10% de persones male-pigadas pro motivos sotziu-curturales o psicologicos ki si nde gosant de tenner calincunu a suta de issos in sa scala sotziale, mescamente de un’átera “ratza”, ca benit megius a ddos regonnoscher.
Ita bi podimus faxer?
Pagu e nudda, biende ki su comunismu est fallidu ke sistema politicu e ke utopia e s’ingiustitzia sotziale non at a sparesser mai in totu.
E de su cristianesimu non nde faeddemus ne-mancu!
E non sunt totus cristianos custos ratzistas?
Su ki si podet e depet faxer est a cumbater sa curtura ratzista e peleare pro tenner prus giustizia sotziale, pro firmare su tantu de is ratzistas a cussu livello fisiologicu.
Tocat a imparare a bi biver impari a su ratzismu, comente amus imparadu a biver impari a sa criminalidade.
Ambos fenomenos ant a esister fintzas a cando esistit s’umanidade.
A dolu mannu.
E su moralismu o s’ipocrisía non serbint a nudda pro ddos firmare.
Serbint de prus “vigilanza” e–candu serbit–repressione.
P.S. Pro su ki pertocat sa repressione: http://www.vitobiolchini.it/2013/08/23/kyenge-a-cagliari-contro-il-razzismo-basta-commenti-intolleranti-su-facebook-sui-blog-e-sui-giornali-si-puo-fare-subito-si-puo-fare-ora/
Spantu ki semus ancora una borta in sintonía. 🙂